«Бюджеттің атқарылуы және оған кассалық қызмет көрсету ережесін бекіту туралы» Қазақстан Республикасы Үкіметінің 2009 жылғы 26 ақпандағы № 220 қаулысына сәйкес және Пәкістан Ислам Республикасының солтүстік-батыс өңірлерінде болған муссондық жауын салдарынан су тасқыны мен көшкіннің туындау себебінен қалыптасқан ауыр әлеуметтік-экономикалық жағдайға байланысты Қазақстан Республикасының Үкіметі ҚАУЛЫ ЕТЕДІ:
1. Қазақстан Республикасы Қаржы министрлігі заңнамада белгіленген тәртіппен Қазақстан Республикасы Сыртқы істер министрлігіне Пәкістан Ислам Республикасына ресми ізгілік көмек көрсету үшін Қазақстан Республикасының және басқа мемлекеттердің аумағындағы табиғи және техногендік сипаттағы төтенше жағдайларды жою үшін 2010 жылға арналған республикалық бюджетте көзделген Қазақстан Республикасы Үкіметінің төтенше резервінен 100 000 (бір жүз мың) АҚШ долларына балама сомада қаражат бөлсін.
2. Қазақстан Республикасы Сыртқы істер министрлігі заңнамада белгіленген тәртіппен көрсетілген қаражатты: «Account name: UN General Trust Fund for sub-account CER», «Bank name: JP Morgan Chase», «Bank address: 270 Park Avenue, New York, NY 10017 USA», «Bank number: (ABA) 021-000-021», «Account number: 485-001969», «Bank Swift code: CHAS US 33 (International transfer)» арнайы банктік шотына аударуды қамтамасыз етсін.
3. Қазақстан Республикасы Қаржы министрлігі заңнамада белгіленген тәртіппен бөлінген қаражаттың нысаналы пайдаланылуын бақылауды қамтамасыз етсін.
4. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі К. Мәсімов
