2016 жылғы 1 қаңтардан бастап қолданысқа енгізіледі.
«Бағалы қағаздар рыногы туралы» 2003 жылғы 2 шілдедегі Қазақстан Республикасының Заңы 32-6-бабының 7-1-тармағына сәйкес Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Мемлекеттік ислам арнайы қаржы компаниясын тарату қағидалары бекітілсін.
2. Осы қаулы 2016 жылғы 1 қаңтардан бастап қолданысқа енгізіледі және ресми жариялануға тиіс.
Қазақстан Республикасының
Премьер-Министрі К.Мәсімов
Қазақстан Республикасы
Үкіметінің
2015 жылғы 31 желтоқсандағы
№ 1167 қаулысымен
бекітілген
Мемлекеттік ислам арнайы қаржы компаниясын тарату қағидалары
1. Осы Мемлекеттік ислам арнайы қаржы компаниясын тарату ережелері «Бағалы қағаздар рыногы туралы» 2003 жылғы 2 шілдедегі Қазақстан Республикасының Заңы 32-6-бабының 7-1-тармағына сәйкес әзірленген және мемлекеттік ислам арнайы қаржы компаниясын (бұдан әрі – компания) тарату тәртібін айқындайды.
2. Компания соттың шешімі бойынша банкрот болған жағдайда және Қазақстан Республикасының заңнамасымен қарастырылған өзге жағдайларда таратылуы мүмкін.
3. Компанияны тарату Қазақстан Республикасы Үкіметінің шешімімен қабылданады.
Бұл ретте, компанияны ерікті түрде тарату компания шығарған мемлекеттік ислам бағалы қағаздары шығарылымын өтеудің қорытындылары туралы есеп бекітілгеннен кейін жүзеге асырылуы мүмкін.
4. Мемлекеттік мүлікті басқару жөніндегі уәкілетті орган компанияны тарату туралы шешiм қабылданғандығын заңды тұлғаларды тiркеудi жүзеге асыратын әдiлет органына, тіркеу орны бойынша мемлекеттік кіріс органына дереу жазбаша түрде хабарлайды.
5. Мемлекеттік басқарудың тиісті саласын (аясын) басқару жөніндегі уәкілетті орган компанияның жарғылық капиталында мемлекеттік қатысу иеленген Мемлекеттік мүлікті басқару жөніндегі уәкілетті органмен келісім бойынша компанияны тарату шешімі қабылданғаннан кейін компания тарату комиссиясын күнтізбелік он күн ішінде құрылып компанияның мүлкiн және iстерiн басқару жөнiндегі өкiлеттiк соған ауысады.
6. Тарату комиссиясы компанияны тарату, сондай-ақ оның кредиторларының талаптарын мәлiмдеу тәртiбi мен мерзiмi туралы ақпаратты Қазақстан Республикасы Әділет министрлігінің ресми баспа басылымдарында компанияны тарату комиссиясы құрылғаннан кейін күнтізбелік он күн ішінде жариялайды. Банкроттық жағдайларын қоспағанда, талаптарды мәлiмдеу мерзiмi тарату туралы хабарландыру жарияланған кезден бастап екi айдан кем болмайды. Банкроттық кезінде кредиторлардың банкротқа қоятын талаптары кредиторлардың талаптарын мәлімдеу тәртібі туралы хабарландыру жарияланған кезден бастап бір ай мерзімнен кешіктірмей мәлімделуге тиіс.
мерзімі тарату туралы хабарландыру жарияланған кезден бастап екі айдан кем болмайды.
Тарату комиссиясы кредиторларды анықтау және қарыздарын алу үшін шаралар қолданады, сондай-ақ кредиторларға компанияның таратылғаны туралы жазбаша хабарлайды.
7. Кредиторлар талаптарын қоюға арналған мерзiм аяқталғаннан кейiн тарату комиссиясы күнтізбелік отыз күн ішінде аралық тарату теңгерімін жасайды, онда компания мүлкiнiң құрамы, кредиторлар қойған талаптар тiзбесi, сондай-ақ оларды қарау нәтижелерi туралы мәлiметтер қамтылады.
Аралық тарату теңгерімін мемлекеттік басқарудың тиісті саласын (аясын) басқару жөніндегі уәкілетті орган бекiтедi.
8. Аралық тарату теңгерімін жасаған кезде таратылатын компания мүлкінің құрамына Қазақстан Республикасы Үкіметінің шешімі негізінде компанияға сатылған мүлік кірмейді. Тарату комиссиясы көрсетілген мүлікті Қазақстан Республикасының Үкіметі айқындайтын тәртіппен және мерзімдерде Қазақстан Республикасының меншігіне береді.
9. Компанияның кредиторларына ақша төлеудi тарату комиссиясы Қазақстан Республикасының Азаматтық кодексінде белгiленген кезек тәртiбiмен аралық тарату теңгерімі бекiтiлген күннен бастап, соған сәйкес жүргiзедi.
10. Компанияның таратылатын мемлекеттік ислам бағалы қағаздары бойынша олардың ұстаушылары алдында, сондай-ақ мемлекеттік мүлікті басқару жөніндегі уәкілетті органның және мемлекеттік басқарудың тиісті саласын (аясын) басқару жөніндегі уәкілетті органның алдында міндеттемелері болған жағдайда, тарату мемлекеттік ислам бағалы қағаздарын шығару шарттары ескеріліп жүзеге асырылады.
11. Кредиторлармен есеп айырысу бiткеннен кейiн тарату комиссиясы тарату теңгерімін азаматтық заңнама талаптарына сәйкес жасайды.
12. Бұл туралы мәліметтер Бизнес-сәйкестендiру нөмiрлерiнiң ұлттық тiзiлiмiне енгізілгеннен кейiн компанияның таратылуы аяқталған болып, ал компания өз қызметін тоқтатқан болып есептеледі.
