ЗҚАИ-ның ескертпесі!
Бұйрықтың қолданысқа енгізілу тәртібін 4-т. қараңыз.
"Газ және газбен жабдықтау туралы" Қазақстан Республикасының Заңы 6-бабының 18-6) тармақшасына сәйкес БҰЙЫРАМЫН:
1. Қоса беріліп отырған Тұрмыстық баллондарды сәйкестендіру және тұрмыстық баллондарды есепке алу жүйелерінің жұмыс істеу қағидалары бекітілсін.
2. Қазақстан Республикасы Энергетика министрлігінің Газ және мұнай-газ-химия департаменті Қазақстан Республикасының заңнамасында белгіленген тәртіппен:
1) осы бұйрықты Қазақстан Республикасы Әділет министрлігінде мемлекеттік тіркеуді;
2) осы бұйрықты Қазақстан Республикасы Энергетика министрлігінің интернет-ресурсында орналастыруды;
3) осы бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде Қазақстан Республикасы Энергетика министрлігінің Заң қызметі департаментіне осы тармақтың 1) және 2) тармақшаларында көзделген іс-шаралардың орындалғаны туралы мәліметтерді ұсынуды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының энергетика вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік алпыс күн өткен соң қолданысқа енгізіледі.
|
Қазақстан Республикасы Энергетика министрі |
Б. Акчулаков |
|
"КЕЛІСІЛДІ" Қазақстан Республикасы Индустрия және инфрақұрылымдық даму министірлігі |
|
"КЕЛІСІЛДІ" Қазақстан Республикасы Төтенше жағдайлар министрлігі |
|
"КЕЛІСІЛДІ" Қазақстан Республикасының Ұлттық экономика министрлігі |
|
"КЕЛІСІЛДІ" Қазақстан Республикасының Цифрлық даму, инновациялар және аэроғарыш өнеркәсібі министрлігі |
| Қазақстан Республикасы Энергетика министрі 2022 жылғы 4 тамыздағы № 257 Бұйрығымен бекітілген |
Тұрмыстық баллондарды сәйкестендіру және тұрмыстық баллондарды есепке алу жүйелерінің жұмыс істеу қағидалары
1-тарау. Жалпы ережелер
1. Осы Тұрмыстық баллондарды сәйкестендіру және тұрмыстық баллондарды есепке алу жүйелерінің жұмыс істеу қағидалары (бұдан әрі – Қағидалар) "Газ және газбен жабдықтау туралы" Қазақстан Республикасы Заңы (бұдан әрі – Заң) 6-бабының 18-6) тармақшасына және 29-бабының 5-тармағына сәйкес әзірленген және тұрмыстық баллондарды сәйкестендіру және тұрмыстық баллондарды есепке алу жүйелерінің жұмыс істеу тәртібін айқындайды.
2. Осы Қағидаларда пайдаланылатын ұғымдар:
1) газ толтыру пункті – сұйытылған мұнай газын сақтауға, тұрмыстық баллондарға қотаруға және құюға арналған инженерлік құрылыс;
2) "Қазақстан Республикасының жер қойнауын пайдалануды басқарудың бiрыңғай мемлекеттiк жүйесi" ақпараттық жүйесi (бұдан әрi – ББМЖ) – жер қойнауын пайдалану саласындағы ақпаратты жинауға, сақтауға, талдауға және өңдеуге арналған көмірсутектер және уран өндіру саласындағы уәкілетті органның ақпараттық жүйесі;
3) тұрмыстық баллондарды есепке алу жүйесі – тұрмыстық баллондардың айналымы және тұрмыстық баллондарда өткізілетін сұйытылған мұнай газының көлемі туралы ақпаратты автоматты түрде жинауға, өңдеуге, сақтауға және беруге арналған техникалық құрылғылар мен бағдарламалық қамтылым кешені;
4) тұрмыстық баллонның бірегей зауыттық нөмірі – осы тұрмыстық баллонды өндірушінің тұрмыстық баллонға қойған бірегей нөмірі;
5) тұрмыстық баллонның бірегей коды – сұйытылған мұнай газының тұрмыстық баллондарға әрбір құйылуын бірмәнді сәйкестендіретін, ББМЖ генерациялайтын символдардың қайталанбайтын бірегей тізбегі;
6) уәкілетті орган – газды өндіруді, тасымалдауды (тасуды), сақтауды және көтерме саудада өткізуді, сондай-ақ тауарлық және сұйытылған мұнай газын бөлшек саудада өткізуді және тұтынуды мемлекеттік реттеуді жүзеге асыратын орталық атқарушы орган;
7) уәкілетті органның ақпараттық жүйесі – жер қойнауын пайдалану саласындағы ақпаратты жинауға, сақтауға, талдауға және өңдеуге арналған "Қазақстан Республикасының жер қойнауын пайдалануды басқарудың бірыңғай мемлекеттік жүйесі" интеграцияланған ақпараттық жүйесі;
8) электрондық цифрлық қолтаңба (бұдан әрі – ЭЦҚ) – ЭЦҚ құралдарымен жасалған және электрондық құжаттың анықтығын, оның тиесілілігін және мазмұнының өзгермейтіндігін растайтын электрондық цифрлық нышандар жиынтығы.
2-тарау. Тұрмыстық баллондарды есепке алу жүйелеріне қойылатын талаптар және олардың осындай талаптарға сәйкестігін растау тәртібі, тұрмыстық баллондарды есепке алу жүйелерін белгіленген талаптарға сәйкес емес деп танудың негіздері мен тәртібі
3. Тұрмыстық баллондарды есепке алу жүйелері "Ақпараттандыру туралы" Қазақстан Республикасының Заңы 38-бабының 2-тармағына сәйкес және мынадай талаптарды сақтай отырып құрылады, дамиды және жұмыс істейді:
1) тұрмыстық баллондарды бірегей зауыттық нөмірі бойынша есепке алуды қамтамасыз ету;
2) өнеркәсіптік пайдалануда;
3) уәкілетті органның ақпараттық жүйесімен интеграциялау;
4) Қазақстан Республикасы Үкіметінің 2016 жылғы 20 желтоқсандағы № 832 қаулысымен бекітілген Ақпараттық-коммуникациялық технологиялар және ақпараттық қауіпсіздікті қамтамасыз ету саласындағы бірыңғай талаптарға сәйкес келу.
4. Ақпараттық қауіпсіздік талаптарына сәйкестікке сынақтардың оң нәтижелері бар сынақтар хаттамаларының болуы және уәкілетті органның ақпараттық жүйесімен интеграцияның болуы олардың белгіленген талаптарға сәйкестігін растау үшін негіз болып табылады.
Ақпараттық қауіпсіздік талаптарына сәйкестігіне сынақтар жүргізу "Ақпараттандыру туралы" Қазақстан Республикасы Заңының 7-1-бабының 5) тармақшасына сәйкес ақпараттық қауіпсіздікті қамтамасыз ету саласындағы уәкілетті орган бекітетін "электрондық үкіметтің" ақпараттық объектілерінің және ақпараттық-коммуникациялық инфрақұрылымның аса маңызды объектілерінің ақпараттық қауіпсіздік талаптарына сәйкестігіне сынақтар жүргізу қағидаларына сәйкес жүзеге асырылады.
Ескерту. 4-тармақ жаңа редакцияда - ҚР Энергетика министрінің 26.04.2024 № 173 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) бұйрығымен.5. Осы Қағидалардың 4-тармағында көзделген шарттарға сәйкес келмеу тұрмыстық баллондарды есепке алу жүйелерін белгіленген талаптарға сәйкес келмейді деп тану үшін негіз болып табылады.
6. Тұрмыстық баллондарды есепке алудың меншікті жүйелері болмаған кезде газ толтыру пункттерінің иелері тұрмыстық баллондарды сәйкестендіру және есепке алу жөніндегі уәкілетті органның ақпараттық жүйесін пайдаланады.
7. Уәкілетті органның ақпараттық жүйесіне ақпаратты енгізу жеке кабинет арқылы жүзеге асырылады.
8. Уәкілетті органның ақпараттық жүйесіне ақпаратты енгізу бойынша қолжетімділік жергілікті атқарушы органдарға және газ толтыру пункттерінің иелеріне беріледі және уәкілетті органның ақпараттық жүйесінде тіркелу жолымен жеке кабинет арқылы жүзеге асырылады.
3-тарау. Тұрмыстық баллондарды есепке алу жүйелерін уәкілетті органның ақпараттық жүйесімен синхрондау тәртібі
9. Газ толтыру пункттерінің иелері Заңның 28-бабы 6-тармағының 3) тармақшасына сәйкес тұрмыстық баллондарды есепке алу жүйелерімен берілген бірегей кодпен және (немесе) газ толтыру пункті иесінің тауар таңбасымен тұрмыстық баллондарды сәйкестендіруге міндетті.
10. Бірегей код мынадай деректерді қамтиды:
1) газ толтыру пунктінің атауы;
2) бизнес сәйкестендіру нөмірі немесе газ толтыру пункті иесінің жеке сәйкестендіру нөмірі;
3) құю күні;
4) тұрмыстық баллонның бірегей зауыттық нөмірі;
5) тұрмыстық баллонға құйылған сұйытылған мұнай газының мөлшері;
6) тұрмыстық баллонды куәландыру күні;
7) тұрмыстық баллонды жөндеу күні.
11. Тұрмыстық баллондарды есепке алу жүйелерін уәкілетті органның ақпараттық жүйесімен синхрондау тұрмыстық баллондарды есепке алу жүйелерін уәкілетті органның ақпараттық жүйесімен интеграциялау арқылы қамтамасыз етіледі
12. Тұрмыстық баллондарды есепке алу жүйелерін уәкілетті органның ақпараттық жүйесімен интеграциялау Қазақстан Республикасы Ақпарат және коммуникациялар министрінің міндетін атқарушының 2018 жылғы 29 наурыздағы № 123 бұйрығымен бекітілген "Электрондық үкіметтің" ақпараттандыру объектілерін интеграциялау қағидаларына сәйкес өнеркәсіптік пайдалануға енгізілген "электрондық үкіметтің" сыртқы шлюзі арқылы ғана жүзеге асырылады.
13. Уәкілетті органның ақпараттық жүйесімен интеграцияланатын электрондық ақпараттық ресурстары, интерфейсі, техникалық құжаттамасы және басқа да ілеспе құжаттары қазақ және орыс тілдерінде жасалады және бес жыл бойына сақталады.
14. Тұрмыстық баллондарды есепке алу жүйелерін дербес деректер берілетін және (немесе) дербес деректерге қолжетімділік қамтамасыз етілетін уәкілетті органның ақпараттық жүйесімен интеграциялау дербес деректерді қорғау саласындағы уәкілетті органмен келісу бойынша жүзеге асырылады.
4-тарау. Тұрмыстық баллондарға қойылатын талаптар және оларды сәйкестендіру тәртібі, тұрмыстық баллондарды есепке алу жүйесінде тұрмыстық баллондарды есепке алу шарттары
15. Қазақстан Республикасы Ішкі істер министрінің 2017 жылғы 9 қазандағы № 673 бұйрығымен бекітілген (Нормативтік құқықтық актілерді мемлекеттік тіркеу тізілімінде № 15986 болып тіркелген) Газбен жабдықтау жүйелері объектілерінің қауіпсіздігі жөніндегі талаптарға (бұдан әрі – Талаптар) сәйкес келетін тұрмыстық баллондардың айналымына және тұрмыстық баллондарды есепке алу жүйесінде тіркеуге жол беріледі.
16. Тұрмыстық баллондар Талаптарға сәйкес келсе, тұрмыстық баллондарды есепке алу жүйесінде есепке алынады.
17. Тұрмыстық баллондардың Талаптарға сәйкестігін тексеруді газ толтыру пункттерінің иелері жүзеге асырады.
18. Тұрмыстық баллондарды есепке алу жүйесінде тұрмыстық баллондарды есепке алуды газ толтыру пункттерінің иелері жүргізеді.
5-тарау. Тұрмыстық баллондарды есепке алу жүйесінде тұрмыстық баллондарды есепке алу тәртібі
19. Тұрмыстық баллондарды есепке алу жүйесінде тұрмыстық баллонды бастапқы тіркеу кезінде газ толтыру пунктінің иесі мынадай тіркеу деректерін енгізеді:
1) тұрмыстық баллонның бірегей зауыттық нөмірі;
2) тұрмыстық баллонның сыйымдылығы;
3) тұрмыстық баллонның жасалған күні;
4) тұрмыстық баллонды соңғы жөндеу және (немесе) салыстырып тексеру күні;
5) тұрмыстық баллонды жөндеуге және (немесе) салыстырып тексеруге жауапты адамның тегі, аты, әкесінің аты (бар болса).
Осы тармақтың 4) және 5) тармақшаларында көрсетiлген мәлiметтер болмаған жағдайда, газ толтыру пунктінің иесi тұрмыстық баллондарды салыстырып тексеруді және (немесе) жөндеуді жүзеге асырады, ол туралы тұрмыстық баллондарды есепке алу жүйесіне тиісті ақпарат енгізіледі.
20. Тұрмыстық баллонды сатудың кезінде газ толтыру пунктінің иесі тұрмыстық баллондарды есепке алу жүйесіне мынадай мәліметтерді енгізеді:
1) тұрмыстық баллонды толтыру күні;
2) тұрмыстық баллонды сату күні;
3) тұрмыстық баллонды сатып алған адамның жеке сәйкестендіру нөмірі және тұрғылықты жері.
21. Өткізілген тұрмыстық баллондар және тұрмыстық баллондарда өткізілген сұйытылған мұнай газының көлемі туралы мәліметтерді қалыптастыру уәкілетті органның ақпараттық жүйесінде жүзеге асырылады.
Газ толтыру пунктінің иесі сатқан тұрмыстық баллондар саны бойынша да, тұрмыстық баллондар арқылы өткізілген сұйытылған мұнай газының көлемі бойынша да мәлімет есепке алынады.
Бұл ретте, бір тұрғылықты жері бойынша тіркелген бір немесе бірнеше адамға сатылған тұрмыстық баллондар, мұндай адамдарға өткізілген сұйытылған мұнай газының жалпы массасы күнтізбелік ай үшін 50 (елу) килограмнан асатын болса, есепке алынбайды.
Газ толтыру пунктінің иесі "Дербес деректер және оларды қорғау туралы" Қазақстан Республикасының Заңында белгіленген талаптардың сақталуын ескере отырып, тұрмыстық баллондарды сатып алатын тұлғалар туралы мәліметтерді жинайды.
22. Газ толтыру пункттері бөлінісіндегі тұрмыстық баллондардың айналымы және газ толтыру пункттерінде баллондар арқылы өткізілген сұйытылған мұнай газының көлемі туралы ақпарат уәкілетті органның ақпараттық жүйесіне жіберіледі.
23. Газ толтыру пункттерінің иелері ай сайын, есепті кезеңнен кейінгі айдың 5 (бесінші) күнінен кешіктірмей, облыстың, республикалық маңызы бар қаланың, астананың жергілікті атқарушы органына осы Қағидаларға 1-қосымшаға сәйкес тұрмыстық баллондардың айналымы және тұрмыстық баллондарда өткізілетін сұйытылған мұнай газының көлемі туралы уәкілетті органның ақпараттық жүйесі арқылы ЭЦҚ-мен қол қойылған ақпарат жібереді.
24. Облыстың, республикалық маңызы бар қаланың, астананың жергiлiктi атқарушы органы облыстың, республикалық маңызы бар қаланың, астананың бөлінісіндегі осы Қағидаларға 2-қосымшаға сәйкес ЭЦҚ-мен қол қойылған тұрмыстық баллондарда өткізілетін тұрмыстық баллондардың айналымы және сұйытылған мұнай газының көлемі туралы жиынтық есептi уәкілетті органның ақпараттық жүйесі арқылы уәкілетті органға ұсынады.
| Тұрмыстық баллондарды сәйкестендіру және тұрмыстық баллондарды есепке алу жүйелерінің жұмыс істеу қағидаларына 1-қосымша |
Тұрмыстық баллондар айналымы және тұрмыстық баллондарда сатылатын сұйытылған мұнай газының көлемі туралы ақпарат
Газ толтыру пунктінін атауы__________________________________________.
Бизнес-сәйкестендіру нөмірі немесе газ толтыру пунктінін жеке сәйкестендіру иесінің нөмірі________________________________________________________.
Орналасқан жері _____________________________________________________.
Жеткізу өңірі ______________________________________________________.
______ жылғы _______________ (ай) ақпарат
№ | Тұрмыстық баллон сатылған қала (аудан), елді мекен | Тұрмыстық баллонды сатып алушының ТАӘ | Тұрмыстық баллонды сатып алушының ЖСН | Тұрмыстық баллонды сатып алушының мекенжайы | Тұрмыстық баллонның бірегей коды | Тұрмыстық балон көлемі | Тұрмыстық баллонның бірегей зауыттық нөмірі | Тұрмыстық баллонды сату күні |
1. | ||||||||
2. | ||||||||
3. | ||||||||
| Тұрмыстық баллондарды сәйкестендіру және тұрмыстық баллондарды есепке алу жүйелерінің жұмыс істеу қағидаларына 2-қосымша |
Тұрмыстық баллондар айналымы және тұрмыстық баллондарда сатылатын сұйытылған мұнай газының көлемі туралы жиынтық ақпарат
Өңірдің атауы __________________________________________________.
______ жылғы _______________ (ай) ақпарат
№ | Газ толтыру пунктінің атауы | Тұрмыстық баллон сатылған қала (аудан) | Сатылған тұрмыстық баллон саны | Тұрмыстық баллондарда сатылатын сұйытылған мұнай газының көлемі |
1. | ||||
2. | ||||
3. | ||||
… |
