"Қазақстан Республикасының Мемлекеттік қызметі туралы" 2015 жылғы 23 қарашадағы Қазақстан Республикасы Заңының 5-бабының 2-тармағының 10-1) тармақшасына сәйкес БҰЙЫРАМЫН:
1. Мемлекеттік органдардың жұмыс уақыты режимін сақтауына мониторинг жүргізу қағидалары осы бұйрыққа қосымшаға сәйкес бекітілсін.
2. Қазақстан Республикасы Мемлекеттік қызмет істері агенттігінің (бұдан әрі – Агенттік) Мемлекеттік қызмет саласындағы бақылау департаменті заңнамада белгіленген тәртіппен:
1) Қазақстан Республикасының Әділет министрлігінде осы бұйрықтың мемлекеттік тіркелуін;
2) осы бұйрықтың Агенттіктің интернет-ресурсында орналастырылуын қамтамасыз етсін.
3. Осы бұйрықтың орындалуын бақылау Агенттік Төрағасының мемлекеттік қызмет саласындағы Қазақстан Республикасы заңнамасының сақталуына мемлекеттік бақылау мәселелеріне жетекшілік ететін орынбасары жүктелсін.
4. Осы бұйрық алғаш ресми жарияланған күнінен кейін он күнтізбелік күн өткен соң қолданысқа енгізіледі.
|
Қазақстан Республикасының Мемлекеттік қызмет істері агенттігі төрағасы |
Д. Жазыкбаев |
"КЕЛІСІЛДІ"
Қазақстан Республикасы
Еңбек және халықты әлеуметтік
қорғау министрлігі
| Қазақстан Республикасының Мемлекеттік қызмет істері агенттігі төрағасы 2023 жылғы 29 мамырдағы № 121 бұйрығына қосымша |
Мемлекеттік органдардың жұмыс уақыты режимін сақтауына мониторинг жүргізу қағидалары
1-тарау. Жалпы ережелер
1. Осы Мемлекеттік органдардың жұмыс уақыты режимінің сақталуына мониторинг жүргізу қағидалары (бұдан әрі - Қағидалар) "Қазақстан Республикасының мемлекеттік қызметі туралы" Заңның (бұдан әрі - Заң) 5-бабы 2-тармағының 10-1) тармақшасына сәйкес әзірленді және мемлекеттік органдардың жұмыс уақыты режимін сақтауына мониторинг жүргізу тәртібін айқындайды.
2. Мемлекеттік органдардың жұмыс уақыты режимінің сақталуына мониторинг Қазақстан Республикасының Еңбек кодексінде (бұдан әрі - Кодекс), Заңда және осы Қағидалармен бекітілген тәртіпте жүзеге асырылады.
3. Осы Қағидаларда пайдаланылатын негізгі ұғымдар:
1) жұмыс уақыты - мемлекеттік қызметші жұмыс берушінің актілеріне сәйкес лауазымдық міндеттерін орындайтын уақыт, сондай-ақ еңбек заңнамасына, сәйкес жұмыс уақытына жатқызылған өзге де уақыт кезеңдері;
2) жұмыс уақытының режимі - белгілі бір уақыт кезеңі ішінде жұмыс уақытының нормасын бөлу тәртібі;
3) қол жеткізуді бақылау және басқару жүйесі - мемлекеттік органдардың ғимараттарына келетін адамдардың кіруін басқаруды жүзеге асыратын, техникалық, ақпараттық, бағдарламалық үйлесімге ие, бақылау мен басқарудың бірлесе әрекет ететін техникалық құралдарының (механикалық, электрмеханикалық, электрлік, электрондық құрылғылар, конструкциялар және бағдарламалық құралдар) жиынтығы;
4) мемлекеттік қызмет істері жөніндегі уәкілетті орган (бұдан әрі -уәкілетті орган) - мемлекеттік қызмет саласында бірыңғай мемлекеттік саясатты іске асыруды жүзеге асыратын орталық мемлекеттік орган;
5) үстеме жұмыс - қызметкер жұмыс берушінің бастамасы бойынша жұмыс уақытының белгіленген ұзақтығынан тыс (есептік кезеңдегі жұмыс сағаттарының қалыпты санынан тыс) орындайтын жұмыс;
4. Жұмыс уақытының режимі мемлекеттік органдармен бекітілетін мемлекеттік қызметшілердің еңбек тәртіптемесі қағидаларында белгіленеді.
5. Мемлекеттік органдардың жұмыс уақыты режимінің сақталуына мониторингті уәкілетті органның лауазымды адамдары мемлекеттік органдарға бармай, сондай-ақ мемлекеттік органға бару арқылы жүзеге асырады.
2-тарау. Мемлекеттік органдарға бармай жұмыс уақыты режимінің сақталуына мониторинг жүргізу тәртібі
6. Мемлекеттік органдарға бармай жұмыс уақыты режимінің сақталуына мониторинг тұрақты негізде жүргізіледі.
7. Мемлекеттік органдарға бармай жұмыс уақыты режимінің сақталуына мониторинг жүргізудің көзі болып ақпараттық жүйелердегі мәліметтер, мемлекеттік органдардың уәкілетті органға не оның аумақтық бөлімшелеріне ұсынатын мәліметтері, қол жеткізуді бақылау және басқару жүйесінің деректері, бұқаралық ақпарат құралдары мен әлеуметтік желілердегі жарияланымдар табылады.
8. Мемлекеттік органдар тоқсан сайын уәкілетті органға немесе оның аумақтық бөлімшелеріне мемлекеттік қызметшілердің жұмыс уақытын есептеу нәтижесі жөнінде ақпаратты ұсынады.
Орталық мемлекеттік органдар ақпаратты уәкілетті органға, жергілікті атқарушы органдар, жергілікті бюджеттен қаржыландырылатын атқарушы органдар, мәслихат аппараттары және ревизиялық комиссиялар ақпаратты уәкілетті органның тиісті аумақтық бөлімшесіне ұсынады.
3-тарау. Мемлекеттік органға бару арқылы, жұмыс уақыты режимінің сақталуына мониторинг жүргізу тәртібі
9. Мемлекеттік органға бару арқылы жұмыс уақыты режимінің сақталуына мониторинг мемлекеттік органдарға бару жоспарына сәйкес (бұдан әрі – Жоспар) бір тоқсан ішінде бір реттен кем емес жүзеге асырылады.
10. Жоспарлар уәкілетті органмен және оның аумақтық бөлімшелерімен бір жылға бекітіледі және алдын ала мүдделі мемлекеттік органдарға жіберіледі.
11. Мемлекеттік органдардың жұмыс уақыты режимін мүлтіксіз сақталуын қамтамасыз ету мақсатында мемлекеттік органға бару арқылы тиісті мониторинг жылына екі реттен көп емес жоспардан тыс жүзеге асырылуы мүмкін.
12. Уәкілетті органның және оның аумақтық бөлімшелерінің лауазымды адамдары жұмыс уақыты режимінің сақталуына мониторингті жүзеге асыру мақсатында сәйкестендіру карталарын көрсетіп мемлекеттік органдардың ғимаратына кедергісіз кіруге құқығы бар.
13. Уәкілетті органның және оның аумақтық бөлімшелерінің лауазымды адамдары мемлектеттік органдарға бару арқылы мониторинг жүргізу барысында түсіндірмелер талап ете алады, сондай-ақ техникалық тіркеу құралдарын пайдалана алады.
14. Мемлекеттік қызметшілердің жұмыстан тыс уақытта жұмыс орнында болу фактілері уәкілетті органның және оның аумақтық бөлімшелерінің лауазымды тұлғаларымен актіленеді.
15. Қажет болған жағдайда мемлекеттік органға бару арқылы жұмыс уақыты режимінің сақталуына мониторинг жүргізу үшін әдеп жөніндегі уәкілдер мен қоғам өкілдері тартылуы мүмкін.
16. Мемлекеттік органға бару арқылы жұмыс уақыты режимінің сақталуына мониторинг жүргізуге қатысатын мемлекеттік қызметшілер мемлекеттік органдармен Қазақстан Республикасы Еңбек кодексінің 108, 109-баптарында көзделген құқықтармен қамтамасыз етіледі.
4-тарау. Мемлекеттік органдардың жұмыс уақыты режимін сақтауына мониторинг нәтижелері
17. Жұмыс уақыты режимінің сақталуына мониторинг нәтижелері тоқсан сайын жұмыс уақыты режимінің бұзылуының алдын алу және оған жол бермеуді қоса алғанда тиісті шаралар қолдану үшін мемлекеттік органдарға жолданады.
